Instituti Demokracia në Veprim (DnV) ka publikuar vlerësimin analitik për fillimin e fushatës zgjedhore, duke vënë në pah një intensitet të lartë të aktiviteteve në terren, të përqendruara kryesisht në tubimet hapëse në qendrat kryesore të Kosovës.
Sipas përfaqësueses së DnV-së, Violeta Haxholli, ndonëse partitë kanë ndërmarrë ndryshime deri në 50% në listat e kandidatëve krahasuar me zgjedhjet e dhjetorit të vitit 2025, përfaqësimi i grave ka mbetur i pandryshuar. Komunat me numrin më të lartë të kandidatëve janë:
• Prizreni me 157 kandidatë
• Prishtina me 153 kandidatë
• Ferizaj me 77 kandidatë
• Peja me 68 kandidatë
• Fushë Kosova me 55 kandidatë
Në lidhje me ofertat politike, DnV vlerëson se programet janë kryesisht një riciklim i zotimeve të mëparshme, të fokusuara në energji, paga, skema sociale, infrastrukturë dhe teknologji.
Një shqetësim tjetër i ngritur në raport ka të bëjë me konkurrencën e pabarabartë. Organizata thekson se shfrytëzimi i resurseve publike dhe vendimet e qeverisë në detyrë për shpërndarjen e përfitimeve financiare kanë krijuar një avantazh për partinë në pushtet. Përveç këtyre sfidave, raporti evidenton gjuhën e urrejtjes në hapësirën digjitale si dhe përfshirjen e fëmijëve në aktivitete politike, për të cilat janë dorëzuar dy ankesa zyrtare në Panelin Zgjedhor për Ankesa dhe Parashtresa (PZAP).