Koalicioni Demokracia në Veprim (DnV) ka publikuar gjetjet për fushatën e zgjedhjeve të parakohshme parlamentare të 7 qershorit, duke e vlerësuar procesin si konkurrues dhe kryesisht të qetë. Sipas vlerësimit, subjektet politike zhvilluan aktivitetet e tyre pa incidente serioze, megjithatë u evidentuan sfida si pabarazia në garën zgjedhore, e ndikuar nga vendimet e institucioneve publike para fillimit të fushatës.
Fushata u përqendrua te promovimi i liderëve politikë dhe përdorimi i sloganeve, duke lënë në plan të dytë kandidatët individualë dhe debatet thelbësore. Temat kryesore ishin ekonomia, energjia, pagat, pensionet dhe infrastruktura, mirëpo DnV theksoi se shumica e premtimeve mbetën të pashpjeguara sa i përket kostos financiare dhe zbatueshmërisë.
Në aspektin gjinor dhe demografik, raporti vëren se mbi gjysma e kandidatëve garojnë për herë të parë, ndërsa gratë përbëjnë 34 për qind të listave. Megjithatë, organizata shprehu shqetësim se gratë kishin hapësirë dukshëm më të kufizuar në debatet televizive krahasuar me burrat. Gjithashtu, DnV ngriti shqetësime për përdorimin e fëmijëve në aktivitete politike dhe përhapjen e dezinformimit në internet.
Sa i përket fushës digjitale, monitorimi i rreth 500 profileve tregoi se gjatë javës së fundit të fushatës u shpenzuan mbi 100 mijë euro për sponsorizime. Partitë me shpenzimet më të larta në këtë segment rezultojnë PDK, e ndjekur nga LDK dhe LVV.