Organizata Demokracia në Veprim (DnV) ka publikuar Deklaratën Preliminare për zgjedhjet e parakohshme parlamentare të 7 qershorit 2026, duke i cilësuar ato si zgjedhje të lira, konkurruese dhe të qeta. Përfaqësuesi i DnV-së, Eugen Cakolli, theksoi se procesi zgjedhor u administrua në mënyrë profesionale dhe efikase, duke u mundësuar qytetarëve ushtrimin e lirë të së drejtës së votës.
Sipas raportit, Komisioni Qendror i Zgjedhjeve (KQZ) ka shënuar progres në funksionimin e brendshëm institucional, duke shmangur polarizimet dhe përplasjet politike që kishin karakterizuar proceset e mëhershme. Megjithatë, DnV vërejti se në disa raste, veprimet e ndërmarra nga KQZ tejkaluan bazën ligjore ekzistuese.
Një aspekt kryesor i vëzhguar është lodhja zgjedhore e qytetarëve, e cila u reflektua në një pjesëmarrje të ulët në votime. Kjo gjendje u lidh me riciklimin e ofertave politike dhe kontekstin e pazakontë institucional, pasi këto ishin zgjedhjet e treta parlamentare në një afat prej rreth 16 muajsh. Ky cikël zgjedhor, sipas vëzhguesve, është pasojë e pamundësisë së forcave politike për të siguruar konsensus dhe për të ndërtuar institucione stabile.