Zyrtarët doganorë në Zyrën Doganore të Prishtinës kanë zbuluar mallra të padeklaruara gjatë kontrollit të një dërgese. Bëhet fjalë për preparate për trajtimin e flokëve pas implantit, në vlerë rreth 13 mijë euro, të cilat nuk ishin përfshirë në dokumentacionin përkatës doganor.
Dogana e Kosovës ka njoftuar se pas verifikimeve të kryera, mallrat janë ndaluar dhe konfiskuar në përputhje me procedurat ligjore në fuqi. Rasti është trajtuar sipas dispozitave të legjislacionit doganor, me qëllim parandalimin e shmangies nga detyrimet doganore.
Ky veprim konfirmon përkushtimin e Doganës së Kosovës për forcimin e kontrolleve doganore, luftimin e aktiviteteve të paligjshme në tregti dhe mbrojtjen e konkurrencës së ndershme në treg.