Zyra e Brendshme Doganore në Prishtinë ka kryer një kontroll në një dërgesë mallrash të deklaruara si lëndë e parë për prodhim. Gjatë ekzaminimit të detajuar, doganierët kanë konstatuar mospërputhje ndërmjet përshkrimit të deklaruar dhe gjendjes faktike të mallit.
Mallrat nuk përbëjnë lëndë të parë, por produkte farmaceutike të gatshme, të paketuara për shitje me pakicë. Me këtë veprim është tentuar shmangia e pagesës së TVSH-së, si dhe nuk është paraqitur dokumentacioni shtesë përkatës, përfshirë certifikatën për import të produkteve farmaceutike të gatshme.
Sipas Doganës së Kosovës, vlera totale e mallrave arrin rreth 49 mijë euro. Ky rast përbën kundërvajtje doganore, në përputhje me legjislacionin në fuqi, për shkak të deklarimit të pasaktë të të dhënave doganore me qëllim shmangien e pagesës së detyrimeve fiskale.
Përditësime
Pas kapjes së barnave me vlerë rreth 49 mijë euro, Dogana e Prishtinës deklaroi: "Mbetemi të përkushtuar në ruajtjen e funksionit rregullator dhe fiskal të shtetit, mbrojtjen e shëndetit publik dhe parandalimin e keqpërdorimeve gjatë importit të produkteve farmaceutike".