Gjatë kontrolleve të shtuara në pikën e kalimit kufitar në Merdarë, zyrtarët e Doganës së Kosovës kanë identifikuar një sasi të konsiderueshme parash të padeklaruara. Sipas njoftimit zyrtar, bëhet fjalë për shumën prej 63,400 eurosh, e cila u gjet gjatë kontrollit të një autobusi që qarkullonte në relacionin Gjermani–Kosovë.
Paratë ishin fshehur brenda bagazhit personal të drejtuesit të autobusit. Në përputhje me procedurat ligjore, mjetet monetare janë ndaluar, ndërsa rasti është dërguar për trajtim të mëtejmë. Dogana e Kosovës ka rikujtuar udhëtarët që të zbatojnë detyrimin për deklarimin e mjeteve monetare gjatë kalimit të kufirit, në përputhje me kërkesat ligjore.
Ky veprim është ndërmarrë në kuadër të kontrolleve të vazhdueshme që ky institucion është duke zbatuar në pikat kufitare. Qëllimi i këtyre masave, siç theksohet nga autoritetet, është parandalimi dhe luftimi i bartjes së paligjshme të parave dhe formave të tjera të kriminalitetit ndërkufitar.
Përditësime
Autoritetet konfirmuan se autobusi i ndaluar në pikën kufitare të Merdarës i përkiste kompanisë së transportit Barileva Turist. Ky informacion u bë i ditur pas verifikimeve shtesë të kryera nga ekipet e Doganës së Kosovës mbi mjetin e përfshirë në rastin e sekuestrimit të 63 mijë e 400 eurove.