Pas gati dy vitesh nga ngjarja tragjike në hotelin CasaSur Palermo në Buenos Aires, ku humbi jetën ish-anëtari i grupit One Direction, Liam Payne, janë bërë publike detaje të reja nga dosja hetimore. Mbi 3,000 faqe dokumentesh, përfshirë dëshmi dhe regjistrime të kamerave të sigurisë, pasqyrojnë një situatë që u përkeqësua gradualisht përmes përdorimit të alkoolit dhe drogës.
Sipas materialeve hetimore, në orët para rënies së tij nga kati i tretë, Payne kishte kërkuar pesë gramë kokainë dhe u kishte ofruar dy grave një pagesë prej 5 mijë dollarësh për të qëndruar me të. Kur këngëtari nuk mundi të paguante shumën, dyshohet se ai përplasi një orë Rolex në mur, pas refuzimit të tyre për ta pranuar atë në këmbim të parave. Punonjësit e hotelit, përfshirë menaxheren Gilda Martin, e kishin identifikuar atë si një klient të vështirë, duke ndërmarrë masa sigurie gjatë komunikimit me të.
Pamjet filmike tregojnë Payne në gjendje të rënduar, duke u lëkundur në një shtyllë jashtë hotelit rreth orës 03:20 të mëngjesit dhe më pas duke u shoqëruar drejt dhomës së tij nga stafi, pak përpara se të ndodhte rënia në orën 17:07. Edhe pse është ngritur hipoteza se ai mund të ketë provuar të zbriste ose ngjitej nga ballkoni, autoritetet argjentinase nuk kanë gjetur prova të ndërhyrjes së tretë apo të vetëvrasjes. Babai i këngëtarit, Geoff Payne, ka theksuar bindjen e tij se i biri nuk kishte synuar t’i jepte fund jetës, duke e lidhur ngjarjen me mungesën e kontrollit për shkak të substancave.
Analizat toksikologjike konfirmuan praninë e alkoolit, kokainës dhe ilaçeve. Sipas Telegrafit, në organizmin e tij u gjet edhe "pink cocaine", një përzierje që mund të përmbajë ketaminë, MDMA dhe metamfetaminë. Në aspektin gjyqësor, procesi vazhdon ndaj Braian Nahuel Paiz dhe Ezequiel David Pereyra, të cilët akuzohen për furnizimin e këngëtarit me lëndë narkotike, pasi akuzat ndaj personave të tjerë si Rogelio Nores u rrëzuan.