Në Gjykatën e Kurorës në Winchester po zhvillohet gjyqi për vrasjen e Danny Cahalane, i cili humbi jetën pas një sulmi me acid sulfurik në shtëpinë e tij në Plymouth më 21 shkurt 2025. Ai u dërgua në spital dhe vdiq 10 javë më vonë, më 3 maj 2025, për shkak të plagëve të rënda në trup.
Sipas prokurorisë, ish-bashkëshortja e tij, Paris Wilson, nënë e një fëmije dhe ish-punonjëse e shërbimit të provës, i dërgoi një mesazh kërcënues viktimës katër ditë para sulmit: “Të uroj ty dhe të dashurës tënde të përfundoni me acid në fytyrë”.
Prokuroria pretendon se Paris Wilson i zbuloi vendndodhjen e Danny Cahalane-s trafikantit të drogës Ryan Kennedy, i njohur si “Frost”, me bazë në Dubai. Sulmi dyshohet se u organizua për shkak se viktima i detyrohej Kennedy-s rreth 120 mijë paund, shuma e humbur në lojëra fati nga fitimet e një rrjeti kriminal.
Prokurorja Joanne Martin KC deklaroi se Wilson bashkëpunoi për të përfituar financiarisht dhe sepse mendonte se viktima e meritonte dëmin. Para sulmit, Cahalane kishte marrë kërcënime të përsëritura për vdekje, përfshirë një mesazh nga Frost: “Do të vdesësh. Do t’u paguaj që të t’i nxjerrin sytë nga koka”.
Më 19 janar 2025 raportohet një tentativë rrëmbimi, kur tre burra përpiqën ta nxirrnin viktimën nga makina e tij. Ai u largua i tmerruar. Prokuroria thekson se Wilson ishte e vetmja që mund ta dinte vendndodhjen e saktë të viktimës ditën e sulmit, pasi ai po sillte vajzën e tyre në shtëpinë e saj. Në mesazhe për nënën e saj, ajo shprehej e shqetësuar për “karmën”.