Drejtoresha e Klinikës së Nefrologjisë, Mimoza Berbatovci-Ukimeraj, ka njoftuar zyrtarisht dorëheqjen nga pozita e saj, duke mos e përfunduar mandatin e dytë. Ajo ishte emëruar në këtë post gjatë mandatit të qeverisë së Lëvizjes Vetëvendosje.
Përmes një njoftimi publik, Berbatovci-Ukimeraj ka bërë të ditur se vendimi për largim vjen si pasojë e vështirësive të vazhdueshme në bashkëpunimin me strukturat udhëheqëse të SHSKUK-së dhe QKUK-së. Ajo deklaroi se presionet e shfaqura gjatë ushtrimit të detyrës kanë cenuar pavarësinë e saj profesionale dhe kanë pamundësuar përmbushjen e përgjegjësive në interes të pacientëve dhe stafit.
Sipas saj, dorëheqja përbën një akt përgjegjësie dhe integriteti, duke nënvizuar se funksionet drejtuese duhet të bazohen mbi ligjin, etikën profesionale dhe respektin e ndërsjellë. Ajo vlerësoi se, në kushtet kur këto parime mungojnë, tërheqja nga pozita është veprimi i duhur.
Gjatë pesë viteve në këtë pozitë, Berbatovci-Ukimeraj ka listuar disa arritje të rëndësishme në përmirësimin e shërbimeve nefrologjike, ndër të cilat:
• Funksionalizimi i Qendrës së Hemodializës në Rahovec;
• Nisja e shërbimit të hemodializës në Podujevë;
• Futja e metodave të reja për matjen e niveleve të barnave imunosupresive për pacientët e transplantuar.