Qendra Klinike Universitare e Kosovës (QKUK) ka njoftuar pacientët e programit të hemodializës se shërbimet do të zhvendosen përkohësisht në qendrat më të afërta me vendbanimin e tyre. Ky ndryshim organizativ vjen si pasojë e punimeve renovuese që po zhvillohen në Qendrën e Hemodializës.
Sipas Klinikës së Nefrologjisë, qëllimi i këtij planifikimi është garantimi i vazhdimësisë së trajtimit dhe ruajtja e standardeve të larta të kujdesit shëndetësor. Institucioni ka njoftuar se sistemimi i pacientëve është realizuar në koordinim me institucionet përkatëse shëndetësore dhe nën mbikëqyrjen e stafit profesional, për të siguruar një proces të sigurt dhe efikas.
QKUK thekson se, pas përfundimit të punimeve dhe krijimit të kushteve optimale, aktiviteti i hemodializës do të rikthehet në mjediset e Qendrës së Hemodializës pranë këtij institucioni. Klinika e Nefrologjisë ka falënderuar pacientët, familjarët dhe qytetarët për mirëkuptimin dhe bashkëpunimin e treguar gjatë kësaj periudhe tranzitore.