Qendra Klinike Universitare e Kosovës (QKUK) ka realizuar për herë të parë në Kosovë intervenimin kirurgjik minimal invaziv Nephrolitotomia Perkutane (PCNL – Percutaneous Nephrolithotomy) për trajtimin e gurëve të mëdhenj në veshka.
Shërbimi Spitalor Klinik dhe Universitar (SHSKUK) njoftoi se deri tani pacientët me këtë patologji kërkonin trajtim jashtë institucioneve publike shëndetësore. Aplikimi i kësaj procedure në QKUK përbën një hap të rëndësishëm në avancimin e shërbimeve urologjike dhe ofrimin e trajtimeve moderne në sistemin publik shëndetësor të Kosovës.
Procedura u realizua nga ekipi i Klinikës së Urologjisë në bashkëpunim me Klinikën e Anesteziologjisë, duke përdorur teknologjinë e laser-it holmium për thyerjen dhe largimin e gurëve përmes qasjeje minimale invazive. Metoda PCNL kryhet me prerje të vogël në lëkurë, duke mundësuar qasje direkte në veshkë.
Kjo teknikë zvogëlon traumën kirurgjike, kohën e qëndrimit në spital dhe periudhën e rikuperimit. Pacienti me inicialet N.M., i lindur në vitin 1967, është rasti i parë që iu nënshtrua me sukses intervenimit dhe u lirua në gjendje të mirë shëndetësore.