Në Shërbimin e Kardiokirurgjisë të Qendrës Spitalore Universitare Nënë Tereza (QSUT) u realizua më 14 maj 2026 për herë të parë një ndërhyrje inovative mini-invazive për bypass koronar te një pacient 74-vjeçar.
Ndërhvrja u krye pa hapje të sternumit dhe pa ndaluar zemrën, duke përdorur një miniincizion prej vetëm 5 cm në hapësirën e 5-të interkostale. Ministria e Shëndetësisë dhe Mbrojtjes Sociale njoftoi për suksesin e saj në faqen zyrtare në Facebook.
Sipas Prof. asc. Altin Veshti, pacienti u paraqit në urgjencë me infarkt të ventrikulit të djathtë. Në fazën akute, ekipi mjekësor vendosi një stent në arterien koronare të djathtë për të stabilizuar gjendjen. Më pas, sipas protokollit, u krye bypass-in me arterinë mamarie drejt LAD-së, arterisë kryesore të zemrës.
Kjo teknikë sjell përfitime si rikuperim i shpejtë, mungesë transfuzioni gjaku, më pak dhimbje pasoperatore dhe më pak komplikacione. Pacienti pritet t’i kthehet jetës normale brenda pak ditësh.
Ministria e Shëndetësisë dhe Mbrojtjes Sociale e cilësoi ndërhyrjen si hap të rëndësishëm drejt kirurgjisë moderne kardiake me më pak traumë për pacientin. Kjo arritje shënon përparim në kardiokirurgjinë shqiptare dhe aplikimin e teknikave bashkëkohore në sistemin shëndetësor publik.