Shërbimi i Neuroradiologjisë Intervencionuese në Qendrën Spitalore Universitare "Nënë Tereza" ka vënë në funksion shërbimin e trombektomisë mekanike, një ndërhyrje thelbësore për heqjen e mpiksjes së gjakut që bllokon arteriet cerebrale. Procedura vlerësohet si vendimtare për kufizimin e dëmtimeve neurologjike tek pacientët që pësojnë goditje ishemike akute, pasi koha e ndërhyrjes ndikon drejtpërdrejt në rikuperimin e tyre.
Suksessi i kësaj ndërhyrjeje të parë i atribuohet një ekipi të specializuar mjekësor, në përbërje të të cilit janë:
• Prof. Dr. Arben Rroji
• Dr. Eris Ranxha (Shërbimi Neurovaskular)
• Prof. Dr. Ilirjana Zekja (Shërbimi i Neurologjisë)
• Prof. Dr. Krenar Lilaj (Reanimator)
• Dr. Thoma Kalefi (Reanimator)
• Dr. Majlinda Shyti (Neurologe)
Modernizimi i këtij shërbimi vjen përmes instalimit të Angiografit Biplanar dhe krijimit të një kabineti të dedikuar të radiologjisë intervencionuese. Këto investime mundësojnë gjithashtu trajtimin e patologjive të tjera vaskulare dhe cerebrovaskulare, si aneurizmat, duke përdorur angiografinë digjitale me substraksion. Në njoftimin e tij, kryeministri Edi Rama bëri me dije se brenda vitit 2026 në shërbimin e neurokirurgjisë pritet të instalohet edhe një akselerator linear për trajtimin e tumoreve të trurit. Pamjet e publikuara tregojnë se pacienti ka rifituar lëvizshmërinë pas ndërhyrjes.