Qendra Spitalore Universitare "Nënë Tereza" vijon të ofrojë shërbim për trajtimin e sëmundjeve ishemike të zemrës në një regjim 24 orë në 7 ditë të javës. Kardiologu Astrit Ceka theksoi se ndërhyrja e shpejtë në rastet e infarktit të miokardit mbetet vendimtare për shpëtimin e jetës, ndërsa dhimbjet e gjoksit janë simptoma më e shpeshtë me të cilën paraqiten pacientët.
Sipas të dhënave, nga 3 mijë ndërhyrjet koronare të realizuara përmes vendosjes së stentit ose angioplastikës, 2 500 raste janë trajtuar si urgjenca mjekësore. Nga ky numër, 1 700 pacientë janë trajtuar në reanimacion, grup në të cilin përfshihen edhe 100 pacientë të huaj, të cilët përfaqësojnë rreth 6% të totalit të trajtuar në këtë strukturë.
Dr. Ceka bëri të ditur se rezultatet klinike te pacientët e huaj kanë qenë të suksesshme, duke raportuar një shkallë vdekshmërie zero. Ministria e Shëndetësisë vlerësoi se investimet në teknologjinë moderne dhe profesionalizmi i stafit mjekësor kanë ndikuar drejtpërdrejt në rritjen e besimit ndaj shërbimeve shëndetësore në QSUT.