Në Klinikën e Ortopedisë të Qendrës Klinike Universitare të Kosovës (QKUK) është realizuar me sukses një ndërhyrje kirurgjikale e avancuar për trajtimin e një frakture komplekse të pelvikut, të tipit Tile C, te një pacient 50-vjeçar. Sipas njoftimit zyrtar të QKUK-së, ndërhyrja është kryer përmes fiksimit perkutan, një teknikë minimalisht invazive që mundëson stabilizimin e strukturave të dëmtuara përmes prerjeve shumë të vogla.
Kjo metodë moderne redukton dëmtimin e indeve të buta dhe humbjen e gjakut gjatë operacionit. Për pacientin, kjo qasje sjell përfitime të ndjeshme, siç janë zvogëlimi i dhimbjeve pas ndërhyrjes, mundësia për rikuperim më të shpejtë, mobilizim më të hershëm dhe shkurtim të qëndrimit në spital.
Ndërhyrja është realizuar nga ekipi operator i Klinikës së Ortopedisë, i përbërë nga:
- Dr. Bujar Shabani
- Dr. Nderim Salihaj
- Dr. Dafina Bytyqi
Në këtë proces ata bashkëpunuan me ekipin e Anestezionit, të përbërë nga dr. Arben Ahmeti dhe dr. Pranvera Bajrami. Në përbërjen e ekipit mbështetës ishin gjithashtu instrumentarja Donjeta Hamiti dhe teknikja e anestezionit Mirlinda Bytyqi.
Institucioni vlerëson se realizimi i kësaj ndërhyrjeje përfaqëson një hap të rëndësishëm në avancimin e trajtimit kirurgjikal të traumave dhe frakturave komplekse në QKUK. Ky sukses dëshmon përkushtimin e stafit shëndetësor për aplikimin e metodave bashkëkohore dhe minimalisht invazive në praktikën klinike, duke krijuar mundësi të reja për trajtimin e pacientëve që do të kenë nevojë në të ardhmen për këtë procedurë shumë të avancuar.