Dorian Ducka, sipërmarrës dhe këshilltar strategjik ndërkombëtar, mori pjesë në Europa Forum Lech, platformë elitare e dialogut politik dhe ekonomik në Europë. Forumi zhvillohet çdo vit në Lech am Arlberg, Austri.
Europa përballet me sfida si tensionet gjeopolitike, konfliktet në kufijtë e saj dhe transformimet në tregjet globale të energjisë. Forumi shërben si hapësirë për vendimmarrës të lartë, diplomatë, liderë biznesi dhe ekspertë, që diskutojnë drejtimin e kontinentit në rendin global.
Gjatë pjesëmarrjes, Ducka zhvilloi takime me presidentin e forumit dhe ish-komisionerin europian Günther Oettinger. Në fokus ishin roli i Europës në menaxhimin e krizave ndërkombëtare, forcimi i autonomisë strategjike dhe siguria energjetike si shtyllë e stabilitetit dhe konkurrueshmërisë së Bashkimit Europian.
"Europa duhet të veprojë më e bashkuar dhe më strategjike përballë një realiteti gjithnjë e më kompleks global. Siguria energjetike nuk është vetëm çështje ekonomike, por një element thelbësor i sigurisë kombëtare dhe europiane," u shpreh Ducka gjatë forumit.
Aktiviteti mblodhi personalitete si diplomati Wolfgang Ischinger, drejtues i Konferencës së Sigurisë në Mynih, ish-kancelari austriak Wolfgang Schüssel, Claudia Plakolm nga Kancelaria Federale Austriake, si dhe liderë biznesi nga Gjermania dhe Austria.
Pjesëmarrja e Ducka në këtë forum reflekton rritjen e profilit të aktorëve shqiptarë në diskutimet strategjike ndërkombëtare dhe rrjetet elitare europiane.