Dr. Zhan Mitrev mori pjesë në Kongresin e Parë të Kardiologjisë Pediatrike dhe Kirurgjisë Kardiake, i cili zhvillohet në Prishtinë. Në një panel të veçantë, ai ndau 26 vite përvojë profesionale nga Spitali Zhan Mitrev, duke prezantuar arritjet në trajtimin kirurgjik të sëmundjeve të lindura të zemrës para profesionistëve nga Kosova dhe rajoni.
Ai u shpreh se është i lumtur të jetë në Prishtinë për të prezantuar rezultatet e 26 viteve pune në spitalin e tij dhe për të ndarë njohuritë me kolegët dhe të rinjtë. Spitali Zhan Mitrev funksionon si spital i përgjithshëm me fokus të veçantë në kirurgjinë kardiovaskulare.
Sipas Dr. Mitrev-it, që nga viti 2000, spitali ka realizuar mbi 15 000 intervenime kardiovaskulare dhe mbi 10 000 procedura të tjera. Deri tani, mbi 3 milionë pacientë kanë marrë trajtim aty. Në fushën e sëmundjeve të lindura të zemrës, janë trajtuar rreth 1 570 raste, ndërsa spitali kryen rreth 1 000 operacione zemre dhe afro 800 procedura vaskulare në vit.
Ai nënvizoi zhvillimin e vazhdueshëm të trajtimit, duke përmendur avancimin në diagnostikim që nga viti 2007 me përdorimin e CT scan-it. Kongresi bashkon dhjetëra profesionistë të mjekësisë.