Këngëtarja Dua Lipa është përfshirë në debatin publik lidhur me zhvillimet mjedisore në Shqipëri. Në një bashkëbisedim me shkrimtaren Lea Ypi në podkastin e saj Service95, artistja shprehu shqetësimin e saj për faktin se mbrojtja mjedisore mund të ndryshohet pa një konsultim të duhur me publikun.
Ky qëndrim vjen pas afro 50 ditësh protestash në rrugët e Shqipërisë, të njohura si "protestat e flamingove", të cilat kanë si fokus mbrojtjen e zonave natyrore nga ndërtimet. Sipas një artikulli të medias EU Alive, ndërhyrja e këngëtares vlerësohet si një mesazh me ndikim për shkak të profilit të saj global.
Kritika e Dua Lipës fokusohet te ndryshimet ligjore që kanë hapur rrugën për realizimin e projekteve të resorteve luksoze, ku përmendet lidhja me Jared Kushner. Media ndërkombëtare thekson se, megjithëse këngëtarja nuk kërkoi dorëheqjen e qeverisë së kryeministrit Edi Rama, zëri i saj e bën atë një faktor të ri me ndikim në këtë debat, duke tejkaluar kufijtë e një çështjeje lokale.