Këngëtarja Dua Lipa ka komentuar për herë të parë zhvillimet e fundit në Shqipëri, duke u ndalur te çështja e mbrojtjes mjedisore në Zvërnec. Nëpërmjet një promoje të publikuar për podkastin e saj "service95bookclub", artistja shprehu qëndrimin e saj kritik ndaj mënyrës së vendimmarrjes nga ana e qeverisë.
Së bashku me shkrimtaren dhe akademiken Lea Ypi, Dua Lipa diskutoi rëndësinë e transparencës dhe përfshirjes së qytetarëve në vendimet që prekin mjedisin. Artistja theksoi se është shqetësues fakti që qeveria ndryshon ligjet për heqjen e mbrojtjes mjedisore pa zhvilluar më parë konsultime publike. Gjatë këtij diskutimi, ato gjithashtu shprehën frymëzimin e tyre nga protestat që po zhvillohen aktualisht në vend.
Biseda në podkast është realizuar në kuadër të diskutimit mbi librin "Të lirë" (Free) të autores Lea Ypi, ku eksplorohet tranzicioni i Shqipërisë dhe kuptimi i lirisë. Podkasti i plotë me këtë bisedë pritet të publikohet të martën e ardhshme.