Analisti politik serb Dušan Janjiq deklaroi se për manipulimin e zgjedhjeve presidenciale në Shtetet e Bashkuara të Amerikës të vitit 2020 përgjegjëse janë Agjencia e Sigurisë dhe Informacionit të Serbisë (BIA) dhe presidenti Aleksandar Vuçiq.
Ai e bëri këtë deklaratë për agjencinë Beta, duke iu referuar fjalimit të Donald Trump-it në Forumin Ekonomik Botëror në Davos të Zvicrës. Sipas Janjiq-ut, ky fjalim bën të qartë se hetimi për manipulimin e zgjedhjeve është në vazhdim dhe përfshin Beogradin.
"Deri tani ka pasur paralajmërime për nisjen e hetimeve mbi vjedhjen e zgjedhjeve përmes rrjeteve sociale, si dhe për përdorimin e një adrese IP nga Serbia në fushatë kundër Trump-it. Kjo nuk ishte konfirmuar më parë, por pas fjalimit të Trump-it në Davos tani është absolutisht e qartë se hetimi po zhvillohet dhe përfshin Beogradin", tha Janjiq.
Ai theksoi rolin e Agjencisë Kombëtare të Sigurisë amerikane, e cila mbikëqyr sigurinë kibernetike në situata që ndikojnë në interesat dhe demokracinë e SHBA-së. "Nëse rezulton e saktë, duhet pritur ndjekja penale e të gjithë personave të përfshirë. Nuk e përjashtoj mundësinë që BIA ta ketë bërë këtë përmes një agjencie private të lidhur ngushtë me pushtetin dhe konceptin e luftës kundër revolucionit të ngjyrave", shtoi ai.
Janjiq vlerësoi se një numër personash të përfshirë po largohen nga maja e BIA-së, por kjo nuk do t’i shpëtojë nga përgjegjësia. Ai parashtroi pyetjen nëse hetimi do ta përfshijë edhe Vuçiq-in, i cili kontrollon gjithçka në Serbi. Kjo, sipas tij, do të ishte një situatë e vështirë, pasi do të tregonte se një shtet ka zhvilluar një aksion kriminal kibernetik kundër SHBA-së.
Ndërkohë, Donald Trump deklaroi në Davos se të gjithë të përfshirët në vjedhjen e zgjedhjeve do të mbahen përgjegjës dhe hetimi është në fazën përfundimtare. Kompania Dominion Voting Systems, e përdorur për numërimin e votave në zgjedhjet e 2020-ës, ka lidhje operative me Beogradin, ku ndodhet selia e saj evropiane.