Durim Bami u transferua nga burgu i Fushë-Krujës në institucionin e vuajtjes së dënimit në Peqin, ku u vendos në sektorin B të sigurisë së lartë. Ky vendim u mor pas vlerësimeve për rrezik të mundshëm ndaj jetës së tij, me qëllim parandalimin e ngjarjeve kundër tij.
Sipas burimeve pranë sistemit të burgjeve, Bami mbahet në një regjim të posaçëm sigurie. Ai nxirret në oraret e ajrimit vetëm dhe i pashoqëruar nga të burgosurit e tjerë. Ky urdhër i brendshëm zbatohet nga të gjitha turnet e shërbimit të policisë së burgjeve.
Autoritetet theksojnë se informacionet për rreziqet e mundshme trajtohen me konfidencialitet të lartë dhe nuk bëhen publike. Më herët, pas ekstradimit nga Dubai, Bami kishte kërkuar lirimin nga paraburgimi 313, duke argumentuar se i rrezikohej jeta.
Ndërkohë, në disa institucione penitenciare janë zhvilluar kontrolle të befasishme. Këto përfshijnë burgjet e Peqinit dhe Reçit, ku janë kryer verifikime të përsëritura dhe janë rikthyer katër herë.