Policia e Durrësit ka vënë në pranga Gentian Gjyzel, 45 vjeç, pasi dyshohet se ka kryer vjedhje me dhunë në një farmaci. Ngjarja ndodhi në lagjen nr. 12 të qytetit, ku autori hyri në ambientet e biznesit, sulmoi farmacisten dhe mori një shumë parash, veprim i dokumentuar edhe nga kamerat e sigurisë.
Sipas njoftimit zyrtar, shërbimet e Komisariatit të Policisë Durrës identifikuan dhe arrestuan autorin pak orë pas denoncimit. Nga verifikimet rezultoi se 45-vjeçari ka precedentë të theksuar kriminalë në fushën e vjedhjeve dhe, në momentin e kryerjes së këtij krimi, ai ndodhej nën masën e sigurisë "Arrest në shtëpi" për një tjetër vjedhje të mëparshme.
Materialet procedurale janë referuar pranë Prokurorisë së Durrësit për hetime të mëtejshme. Përveç akuzës për vjedhje, ndaj tij rëndon edhe akuza për largimin nga vendi i qëndrimit. Autoritetet po vijojnë hetimet për të zbardhur nëse shtetasi në fjalë është i përfshirë në ngjarje të tjera kriminale.
Përditësime
Policia ka identifikuar autorin e arrestuar si Fatmir Gjyzeli, 45 vjeç. Pamjet e publikuara nga hetuesit dokumentojnë momentin e grabitjes së farmacisë në orët e mbrëmjes, ku i dyshuari shfaqet i maskuar me kapele dhe shall për të fshehur identitetin.