Një 45-vjeçar është arrestuar në flagrancë nga policia e Durrësit pasi ka kanosur me armë zjarri një person tjetër gjatë një konflikti në rrugë.
Ngjarja ndodhi më 16 shkurt 2026, në vendin e quajtur Kodra e Rrashbullit, ku shtetasi E. K., 45 vjeç, banues në Xhafzotaj, u konfliktua për motive të dobëta me shtetasin E. D., 38 vjeç, dhe e kanosi atë me armë zjarri të dyshuar automatik.
Sipas njoftimit të policisë, Specialistët e Seksionit për Hetimin e Krimeve të Rënda të Drejtorisë Vendore të Policisë Durrës kryen hetimet pas kallëzimit të 38-vjeçarit dhe arrestuan autorin në flagrancë.
Gjatë veprimeve hetimore, në automjetin e 45-vjeçarit u gjet bërthama e predhës së një fisheku luftarak. Policia sekuestroi automjetin dhe vijon hetimet për gjetjen e armës së zjarrit, të cilën autori e fshehu pas ngjarjes, si dhe për dokumentimin e rrethanave të rastit.
Materialet procedurale iu referuan Prokurorisë së Durrësit për veprime të mëtejshme.