Qyteti i Durrësit ka shënuar një fluks të konsiderueshëm vizitorësh gjatë ditëve të fundit të muajit maj, duke shënuar kështu fillimin e sezonit veror. Temperaturat e larta kanë ndikuar që qytetarë vendas dhe turistë të huaj t'i drejtohen vijës bregdetare të Adriatikut për të shijuar ditët e para të nxehta.
Vizitorët, të ardhur nga vende të ndryshme si Italia dhe Ukraina, kanë vlerësuar mikpritjen, pastërtinë dhe bukurinë e plazheve. Për shumë prej tyre, Durrësi mbetet një destinacion i preferuar. Turistët theksojnë se afërsia me kryeqytetin dhe larmia e ofertave turistike janë faktorë kyç në zgjedhjen e këtij destinacioni.
Operatorët turistikë janë optimistë për ecurinë e këtij sezoni. Pritet që fluksi i pushuesve të shtohet ndjeshëm gjatë javëve në vijim, ndërsa muaji qershor pritet të shënojë nisjen e rezervimeve të plota dhe ritmin e plotë të veprimtarisë verore në të gjithë zonën.