Dy komisione parlamentare do të mbajnë sot mbledhje në Kuvendin e Kosovës. Në fokus janë shqyrtimi i projektligjit për Byronë Shtetërore dhe raportimi për auditimin e buxhetit të shtetit për vitin 2025.
Shqyrtimi i projektligjit
Në orën 13:00, Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë për Parandalimin e Korrupsionit do të shqyrtojë Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme. Shqyrtimi është pjesë e agjendës së punës së Kuvendit.
Projektligji synon të krijojë bazën ligjore për funksionimin e një mekanizmi shtetëror që do të verifikojë pasuritë, ligjshmëria e prejardhjes së të cilave vihet në dyshim, dhe do të përcaktojë procedurat për konfiskimin e tyre në rastet e parashikuara me ligj. Deputetët pritet të diskutojnë përmbajtjen e nismës, përfshirë dispozitat për organizimin dhe funksionimin e Byrosë, kompetencat e saj dhe procedurat përkatëse.
Krijimi i Byrosë paraqitet si pjesë e përpjekjeve për forcimin e sundimit të ligjit, luftimin e korrupsionit dhe rritjen e përgjegjshmërisë në administrimin e pasurisë. Çështja është diskutuar më parë në rrafshin politik dhe juridik, veçanërisht sa u përket kompetencave të institucionit, mënyrës së verifikimit të pasurisë dhe mbrojtjes së të drejtave kushtetuese të qytetarëve. Në shqyrtim janë edhe siguria juridike, e drejta e pronës dhe standardet e procesit të rregullt ligjor.
Raportimi për auditimin e buxhetit
Në orën 14:00, Komisioni për Mbikëqyrjen e Financave Publike do të dëgjojë raportimin e ministrit të Financave, Hekuran Murati, dhe të Auditorës së Përgjithshme, Vlora Spanca. Ata do të raportojnë lidhur me raportin e Auditorit të Përgjithshëm për Raportin Vjetor të Auditimit të Buxhetit të Kosovës për vitin 2025.