Kuvendi i Kosovës mban të shtunën, më 25 prill 2026, nga ora 12:00, seancë të jashtëzakonshme plenare. Njoftimin e ka dhënë Drejtoria për media dhe marrëdhënie me publikun e Kuvendit.
Në rend dite janë 5 pika:
- Shqyrtimi i parë i Projektligjit nr.10/L-045 për ndryshimin dhe plotësimin e Ligjit nr. 10/L-001 mbi ndarjet buxhetore për Buxhetin e Republikës së Kosovës për vitin 2026;
- Shqyrtimi i parë i Projektligjit nr.10/L-046 për ndryshimin dhe plotësimin e Ligjit nr. 05/L-096 për Parandalimin e Pastrimit të Parave dhe Luftimin e Financimit të Terrorizmit;
- Shqyrtimi i parë i Projektligjit nr.10/L-032 për Energjinë Elektrike;
- Shqyrtimi i parë i Projektligjit nr.10/L-031 për Energjinë;
- Mocion për shqyrtimin e dytë të Projektligjit nr.10/L-019 për Byronë Shtetërore për Verifikimin dhe Konfiskimin e Pasurisë së Pajustifikueshme, me shmangie nga afatet e Rregullores së Kuvendit.
Seanca vjen pas dy seancash të mbajtura të premten. Lëvizja Vetëvendosje ka kërkuar procedimin e shpejtë të projektligjeve për Byronë, energjinë dhe energjinë elektrike, duke u shmangur nga afatet procedurale.
Opozita ka kundërshtuar këtë praktikë. Blerta Deliu, deputete e Partisë Demokratike të Kosovës, ka deklaruar se ligjet nuk janë pronë e qeverisë, Kuvendi nuk është zyrë e fushatës së Albin Kurtit dhe qytetarët nuk meritojnë që vendime të rëndësishme të kalojnë me nguti e fshehtësi për kalkulime elektorale. Ajo ka theksuar se projektligji për Byronë nuk ka kaluar ende në lexim të dytë as në komision.