Katër anëtarë të dy grupeve të organizuara kriminale, dy prej tyre shqiptarë, u dënuan në Britaninë e Madhe për një operacion kontrabande kokaine përmes Aeroportit të Mançesterit.
Hetimi u krye nga Agjencia Kombëtare e Krimit (NCA). Të dënuarit shqiptarë janë Elton Hallaçi, 32 vjeç, dhe Artur Iseberi, 27 vjeç. Ata morën ngarkesat e kokainës nga korrierë amerikanë që vinin nga Kankuni i Meksikës.
Në maj 2024, tetë valixhe me kokainë mbërritën në aeroport. Një valixhe u la pas dhe autoritetet gjetën 20 kg kokainë. Shqiptarët morën rreth 100 kg nga kjo ngarkesë. Më 31 maj 2024 u zbulua një ngarkesë tjetër prej 300 kg kokainë me pastërti të lartë, me vlerë rreth 24 milionë paund.
Në banesën e Hallaçit u gjetën çelësa të një automjeti Jaguar me hapësirë të fshehtë për transport droge dhe blloqe shënimesh në gjuhën shqipe me gjurmë gishtash të Hallaçit dhe Iseberit.
Gjykata dënoi Hallaçin me 21 vjet e 7 muaj burg dhe Iseberin me 18 vjet burg. Dale Creen mori 11 vjet burg, ndërsa dënimi për Dale Hosker pritet më 1 qershor.