Dy kushërinj shqiptarë, të moshës 57 dhe 51 vjeç, u arrestuan më 3 shkurt 2026 në Kretë për një seri vjedhjesh dhe grabitjesh në banesa në rajonet Hersonisos dhe Maleviz.
Hetimet e policisë greke konfirmuan përfshirjen e tyre në nëntë raste gjatë periudhës nga 8 dhjetor 2025 deri më 1 shkurt 2026, prej të cilëve shtatë vjedhje dhe dy tentativa grabitjeje. Sipas dëshmive të viktimave, grabitësit hynin në shtëpi ndërsa banorët ndodheshin brenda dhe i kërcënonin me fraza si “Ej mos lëvizni se kemi armë”.
Midis viktimave ishte një grua shqiptare që ka biznes në zonën e Stalis. Asaj iu vodhën 13 000 euro para cash dhe 600 paund britanik. Në total, grabitësit mendohet të kenë marrë 19 400 euro, 600 paund britanik, si dhe bizhuteri dhe sende të çmuara me vlerë rreth 43 900 euro.
57-vjeçari ka precedent penal dhe, sipas Cretalive, në një rast kishte vjedhur edhe fqinjën e tij pas një konflikti. Në një incident tjetër, kushërinjtë hynë në vilat e sportistëve, ku grabitën orë dhe sende të tjera me vlerë, duke pretenduar se ishin të armatosur.
Gjatë kontrolleve në banesat dhe automjetet e tyre u gjetën dhe u sekuestruan bizhuteri, 730 euro cash, një armë, mjete për vjedhje, si dhe tre makina që dyshohet se përdroheshin për kryerjen e veprave penale. Objektet e sekuestruara iu kthyen pronarëve të ligjshëm.
Hetimet vazhdojnë.