Specialistët e Seksionit për Hetimin e Krimeve në Komisariatin e Policisë Himarë zhvilluan operacionin policor pas kallëzimit të një 70-vjeçari, i cili deklaroi se ishte mbajtur me dhunë nga tre persona në banesën e tij në fshatin Borsh. Sipas njoftimit zyrtar, të rinjtë kishin planifikuar grabitjen duke vëzhguar banesën e viktimës për dy ditë dhe kishin marrë me qira një automjet tip "Mercedes-Benz" për të realizuar krimin.
Në pranga kanë rënë:
• Elkshi Xhemali, 25 vjeç, banues në Selenicë;
• Knidi Truja, 23 vjeç, banues në Vlorë;
• Antonio Cani, 19 vjeç, banues në Vlorë.
Hetimet zbuluan se Antonio Cani kishte thyer masën e sigurisë "Arrest në shtëpi", të caktuar nga gjykata për vepra penale në fushën e narkotikëve. Automjeti i përdorur nga të dyshuarit është sekuestruar në cilësinë e provës materiale. Materialet procedurale i janë referuar Prokurorisë për hetime të mëtejshme.