Gjatë ditës së sotme, në rajonin e Prizrenit janë regjistruar dy raste të personave të gjetur pa shenja jete. Zëdhënësi i Policisë së Kosovës për këtë rajon, Shaqir Bytyqi, ka konfirmuar se për të dyja ngjarjet janë nisur hetime paraprake.
Rasti i parë është raportuar rreth orës 15:40, në rrugën “Turgut Özal” në Prizren. Në banesën e saj është gjetur pa shenja jete një grua rreth 54-vjeçare, vdekjen e së cilës e ka konstatuar ekipi i emergjencës në vendin e ngjarjes. Sipas hetimeve fillestare, dyshohet se viktima ka kryer vetëvrasje.
Rasti i dytë ka ndodhur rreth orës 17:50 në fshatin Restelicë të komunës së Dragashit. Një burrë rreth 68-vjeçar është gjetur pa shenja jete në një zonë pyjore. Edhe në këtë rast, ekipet mjekësore kanë konstatuar vdekjen e viktimës, ndërsa dyshohet po ashtu për vetëvrasje.
Sipas njoftimit zyrtar, me autorizimin e prokurorit kompetent, trupat e pajetë janë dërguar në Institutin e Mjekësisë Ligjore (IML) për obduksion. Policia e Kosovës i ka iniciuar rastet si “Hetim i vdekjes” për të zbardhur plotësisht rrethanat e ngjarjeve.