Të martën, rreth orës 18:30, zyrtarët policorë të angazhuar me detyrë sekondare në Parkun Nacional “Sharri”, së bashku me zyrtarët e pyjeve, gjatë patrullimit në terren, kanë hasur në një mjet transportues druve, të modifikuar si xhip, në të cilin ndodheshin tre persona.
Pas ndalimit të mjetit, dy nga personat kanë penguar vazhdimisht zyrtarët policorë gjatë kryerjes së detyrës. Gjatë arrestimit të shoferit, njëri prej tyre ka vazhduar pengimin duke mbajtur në dorë një motorsharrë.
Njësia e hetimeve të stacionit policor ka kontaktuar prokurorin e shtetit, i cili ka urdhëruar inicimin e rastit penal ndaj I.D dhe F.D për veprën penale “Pengim i personit zyrtar në kryerjen e detyrës zyrtare”.
Për shoferin, i cili kishte tentuar të shmangte policinë, është urdhëruar inicimi i një shënimi zyrtar. Ky do të hetohet nga hetimet e stacionit në bashkëpunim me zyrtarët e Parkut Nacional “Sharri”, për të identifikuar vendndodhjen e prerjes së druve. Ndaj tij është shqiptuar gjithashtu gjobë për moszbatim të urdhrave të zyrtarit policor.
Të dyshuarit janë liruar në procedurë të rregullt. Policia ka publikuar video nga ndërhyrja.
Përditësime
Policia ka konfirmuar se ngjarja ndodhi më 12 maj 2026.