Dy shtetas nga Kosova u arrestuan nga Policia e Shqipërisë nën dyshimin për përfshirje në protestën e dhunshme në Tiranë. Periskopi dhe Gazeta Metro i identifikuan me inicialet D.B. dhe E.S., ndërsa Gazeta Tema, Shekulli dhe Java News publikuan emrat Driton Bytyqi dhe Enes Sopi.
Sipas deklarimeve të publikuara, të arrestuarit thanë se kishin ardhur nga Prishtina për të protestuar kundër qeverisë së kryeministrit Edi Rama dhe për të kërkuar vendosjen e një qeverie që mbështet politikat e Lëvizjes Vetëvendosje. Në procesverbalin e publikuar nga Periskopi, njëri prej tyre tha se ishte simpatizant i kryeministrit të Kosovës, Albin Kurti, dhe se politikat e Kurtit binin ndesh me ato të Ramës. Ai shprehu gjithashtu pakënaqësi për qëndrimin e qeverisë shqiptare ndaj Kosovës.
Të arrestuarit pretenduan se kishin marrë pjesë në protestë në mënyrë paqësore dhe mohuan se kishin kryer veprime të dhunshme. Ata thanë se e kishin mbuluar fytyrën sepse kishin të ftohtë. Sipas burimeve, ndaj tyre janë ngritur akuza për goditje për shkak të detyrës, prishje të rendit dhe qetësisë publike, shkatërrim të pronës dhe kundërshtim të punonjësve të rendit publik. Shekulli përmend edhe akuzën për shkatërrim të pronës me zjarr.
Drejtori i Departamentit për Rendin dhe Sigurinë Publike në Policinë e Shqipërisë, Dhimitraq Ziu, deklaroi se deri të premten në Tiranë ishin arrestuar 127 persona dhe 244 të tjerë ishin proceduar në gjendje të lirë.
Shekulli raportoi gjithashtu se strukturat e Hetimit të Krimit Kibernetik dhe Antiterrorit kishin identifikuar disa kanale dhe grupe komunikimi, përmes të cilave, sipas deklaratës së cituar, ishin shpërndarë mesazhe me përmbajtje kriminale dhe thirrje për akte ekstreme e terroriste.