Aksidenti tragjik i ndodhur në impiantet e rafinerisë "Motor Oil" në Agioi Theodoroi të Greqisë ka shkaktuar humbjen e jetës së dy shtetasve shqiptarë dhe lëndimin e një tjetri. Pas vdekjes së 43-vjeçarit Robert Cakaj, i cili ndërroi jetë më 9 tetor për shkak të dëmtimeve të shumta, ditën e diel ndërroi jetë edhe 50-vjeçari Dorian Hysa, i cili ishte shtruar i intubuar në gjendje kritike në Spitalin e Përgjithshëm “Thriasio” të Elefsinës për shkak të dëmtimeve në kokë. Një punëtor i tretë ka mbetur i lënduar lehtë dhe ka shfaqur probleme me frymëmarrjen si pasojë e incidentit.
Ngjarja ndodhi gjatë ndërhyrjes së punonjësve në shkëmbyesit e nxehtësisë të njësisë U-607, ku një kapak metalik shpërtheu nga çlirimi i gazit nën presion. Hetimet e Policisë greke për zbardhjen e rrethanave dhe shkeljen e rregullave të sigurisë kanë çuar në arrestimin e katër personave, duke e çuar numrin e të ndaluarve nga 3 në 4 persona.
Personat e ndaluar nga autoritetet greke janë:
- Kontraktori 59-vjeçar.
- Përgjegjësi i punimeve 36-vjeçar.
- Drejtuesi 50-vjeçar i departamentit të Shëndetit dhe Sigurisë.
- Operatori i projektit 34-vjeçar.
Sipas hetimeve, të ndaluarit kishin detyrën e mbikëqyrjes së zbatimit të projektit dhe kontrollit të masave mbrojtëse në vendin e punës gjatë proceseve të mirëmbajtjes në rafineri.
Përditësime
Autoritetet greke arrestuan një person të katërt dhe sqaruan se aksidenti ndodhi nga shpërthimi i një kapaku metalik gjatë punimeve në njësinë U-607.