Dy trena lokalë u përplasën ballë për ballë në Danimarkë të enjten, më 23 prill 2026, duke lënë të lënduar midis 5 dhe 10 persona. Incidenti ndodhi në veri të Kopenhagës, në linjën hekurudhore që lidh qytetet Hillerød dhe Kagerup, në zonën e Isterødvejen, sipas policisë dhe shërbimeve emergjente.
Një zëdhënës i departamentit të zjarrfikësve të Kopenhagës së Madhe bëri të ditur se të gjithë pasagjerët janë nxjerrë nga trenat dhe askush nuk është bllokuar. "Ka të lënduar midis pasagjerëve", tha ai, ndërsa transmetuesi publik DR dhe gazeta Ekstrabladet konfirmojnë numrin e lënduarve midis 5 dhe 10.
Forca të shumta policie, zjarrfikësish dhe ekipe shpëtimi mbërritën në vendngjarje. Policia deklaroi se "pjesa e rrugës midis Isterødvejen dhe Kagerup është mbyllur dhe pritet të mbetet e mbyllur për një periudhë të zgjatur". Shoferëve u kërkohet të zbatojnë rregullat e trafikut.
Autoritetet kanë nisur hetimet për të zbardhur shkaqet e aksidentit, por nuk kanë dhënë detaje të mëtejshme për rrethanat apo gjendjen e lënduarve.