Pasditen e kësaj të mërkure, rreth orës 15:15, një aksident detar ka ndodhur në Liqenin e Komanit, kur dy mjete lundruese që udhëtonin në itinerarin Koman–Lumi i Shalës janë përplasur me njëri-tjetrin. Ngjarja ka shkaktuar lëndime te personat që ndodheshin në bordet e këtyre mjeteve.
Sipas njoftimit zyrtar të Policisë së Shtetit, si pasojë e përplasjes janë dëmtuar 5 shtetas, të cilët fatmirësisht janë jashtë rrezikut për jetën. Pas incidentit, të gjithë personat që ndodheshin në varka janë evakuuar dhe nxjerrë në kalatën e Komanit me ndihmën e mjeteve të tjera lundruese që ndodheshin në zonë. Të dëmtuarit janë transportuar drejt Spitalit Rajonal të Shkodrës për të marrë ndihmën e nevojshme mjekësore.
Ndërkohë, grupi hetimor ka mbërritur në vendngjarje dhe po kryen veprimet procedurale për sqarimin e plotë të rrethanave dhe shkaqeve të aksidentit. Ndërsa autoritetet zyrtare konfirmojnë numrin e të lënduarve, disa burime mediatike raportojnë për 8 të plagosur, ndërsa si shkak i mundshëm përflitet shpejtësia e lartë e mjeteve në një zonë me fushëpamje të kufizuar.
Përditësime
Autoritetet shëndetësore njoftuan transportimin me helikopter të 4 të plagosurve drejt Spitalit Rajonal të Shkodrës dhe të një tjetri drejt Spitalit të Traumës në Tiranë. Të dëmtuarit janë identifikuar si 4 shtetas shqiptarë, nga të cilët 3 nga Lezha dhe 1 nga Durrësi, si dhe një shtetas i huaj. Grupi hetimor konfirmoi se shkak i mundshëm i përplasjes është shpejtësia e lartë e mjeteve në një kthesë me fushëpamje të kufizuar.