Dy vatra zjarri janë regjistruar thuajse në të njëjtën kohë në qytetin e Vlorës, duke vënë në gatishmëri shërbimin zjarrfikës, i cili u detyrua të shpërndante forcat për të ndërhyrë paralelisht në dy vendngjarje.
Vatra e parë e zjarrit është shfaqur në ambientet e një biznesi të llojit fast food. Sipas të dhënave paraprake, dyshohet se shkak i flakëve ka qenë shpërthimi i një bombole gazi. Si pasojë, ambienti u mbush me tym të dendur dhe pësoi dëme të konsiderueshme materiale. Ekipet zjarrfikëse ndërhynë me shpejtësi për të izoluar flakët, duke parandaluar përhapjen e tyre në objektet përreth.
Në të njëjtën kohë, një tjetër vatër zjarri përfshiu një kabinë elektrike pranë shkollës "Ali Demi". Për shkak të rrezikut që paraqiste flaka për banorët e pallatit aty pranë, zjarrfikësit ndërprenë furnizimin me energji elektrike dhe neutralizuan situatën në kohë, duke shmangur pasoja më të rënda.
Autoritetet bëjnë me dije se nga të dyja incidentet nuk ka pasur persona të lënduar. Grupet e punës vijojnë verifikimet për të përcaktuar shkaqet e sakta të këtyre ngjarjeve, të cilat shkaktuan dëme materiale në të dyja lokacionet.