Në Novosellë të Kamenicës raportohen dyshime për hyrje të dronëve serbë në territorin e Kosovës. Këto dyshime kanë dalë në media, por nuk ekziston ende konfirmim zyrtar nga Policia e Kosovës apo KFOR-i.
Ish-ushtaraku Hysen Gecaj deklaroi se situata duket më shumë si spekulim sesa realitet. Ai shpjegoi se mungon baza e qëndrueshme për të konfirmuar praninë e dronëve, pasi nuk ka komunikatë nga institucionet shtetërore të Kosovës ose nga KFOR-i, i cili është kompetent për sigurinë dhe integritetin territorial.
Gecaj vlerësoi se një gjë e tillë është e mundshme dhe nuk duhet neglizhuar ose përjashtuar. Megjithatë, ai rikujtoi se në të kaluarën ka pasur informata të pa verifikuara dhe dezinformata të shpeshta për kërcënime territoriale që nuk kanë ndodhur.
Ai kërkoi që KFOR-i, si përgjegjës kryesor për sigurinë, të japë një sqarim publik. Sipas tij, NATO-ja përmes KFOR-it duhet të përgjigjet, pasi shumë faktorë brendshëm e jashtëm mund të përhapin dezinformata për të tërhequr vëmendjen nga ngjarje të tjera.