Policia e Kosovës ka konfiskuar një dron të paidentifikuar në fshatin Muçibabë të Gjilanit, pasi i njëjti u raportua më 8 mars rreth orës 19:20.
Sipas njoftimit zyrtar, droni u vërejt duke fluturuar në një zonë pyjore. Njësitë policore kanë dalë menjëherë në vendngjarje, kanë ndërmarrë veprimet e nevojshme dhe e kanë konfiskuar mjetin. Për rastin është njoftuar edhe prokurori kompetent.
Zëdhënësi i Policisë në rajonin e Gjilanit, Ismet Hashani, ka dhënë detaje shtesë në emisionin "tre8tre". Ai ka thënë se droni u gjet i rrëzuar dhe jo duke fluturuar. "Me të marrë informatën, Policia ka dalë në vendin e ngjarjes dhe e ka marrë mjetin. Hetimet rreth rastit janë duke vazhduar dhe nuk kemi informata se nga ka ardhur mjeti", ka deklaruar ai.
Hashani ka theksuar se informata erdhi nga rrugët operative të policisë dhe se fshati Muçibabë ndodhet afër pikës kufitare me Serbinë. Hetimet në vazhdim do të sqarojnë rrethanat e plota dhe prejardhjen e dronit.
Rasti është iniciuar si "Mbajtje në pronësi, kontroll ose posedim i paautorizuar i armës" dhe "Fotografimi dhe incizimi i paautorizuar". Hetimet vazhdojnë.