Njësia Rajonale e Trafikut Rrugor në Prizren ka filluar zbatimin e një forme të re të mbikëqyrjes së qarkullimit të automjeteve, duke përdorur dronë policorë. Ky aktivitet ka për qëllim identifikimin dhe ndëshkimin e kundërvajtësve që rrezikojnë sigurinë në komunikacion.
Ky veprim është pjesë e planit operativ të koduar “Tejkalimet e palejuara, shpejtësia dhe telefoni”. Sipas njoftimeve zyrtare, masat e reja synojnë parandalimin dhe uljen e aksidenteve rrugore, me fokus të veçantë te rastet me lëndime të rënda dhe ato me fatalitet. Përveç përdorimit të dronëve në zonat me rrezikshmëri të lartë, në kuadër të këtij plani janë shtuar edhe pika të reja të kontrollit në rrugë.
Monitorimi përmes dronëve do të përqendrohet në veçanti te:
• Tejkalimet e palejuara në vijë të plotë
• Krijimi i kolonave të automjeteve
• Sjelljet e tjera që rrezikojnë sigurinë në komunikacion
Policia e Kosovës u ka bërë thirrje të gjithë pjesëmarrësve në komunikacion që të respektojnë rregullat e trafikut dhe të shmangin sjelljet e rrezikshme, me qëllim kontributin në sigurinë e përgjithshme në rrugët e rajonit.