Në rajonin e Prishtinës, Njësiti Rajonal i Trafikut Rrugor i Policisë së Kosovës ka intensifikuar angazhimet për rritjen e sigurisë në trafik gjatë periudhës nga 1 deri më 14 janar 2026.
Gjatë këtyre dy javëve, policia ka identifikuar 353 automjete të paregjistruara, të cilat qarkullonin pa kontroll teknik dhe paraqesin rrezik serioz për pjesëmarrësit në komunikacion, veçanërisht në kushtet dimërore. Në të njëjtën periudhë janë shqiptuar gjithsej 1.883 gjoba për kundërvajtje të ndryshme në trafik, ku tejkalimi i shpejtësisë dhe automjetet e paregjistruara dallohen si sfida kryesore.
Këto aktivitete janë zhvilluar në kuadër të planit operativ „Sezoni Dimëror”, pavarësisht kushteve të vështira atmosferike. Policia ka vepruar në koordinim me zyrtarët e ministrisë përkatëse dhe kompanitë e mirëmbajtjes së rrugëve për rregullimin dhe menaxhimin e trafikut, sidomos në zonat ku qarkullimi ka qenë i penguar.
Autoritetet njoftojnë se angazhimet policore do të vazhdojnë në ditët në vijim për të garantuar mbarëvajtjen dhe sigurinë në rrugë. Policia apelon te drejtuesit e automjeteve të përmbajnë rregullat dhe shenjat e trafikut.