Njësia Rajonale e Trafikut Rrugor në Prizren, në bashkëpunim me inspektorët e Ministrisë së Mjedisit, Planifikimit Hapësinor dhe Infrastrukturës (MMPHI), zhvilloi më 2 mars 2026 një operacion të përbashkët në terren për kontrollin e automjeteve të transportit.
Aktiviteti përfshiu asistimin e inspektorëve gjatë matjes së automjeteve me peshore, patrullimin në zonën e përgjegjësisë, si dhe kontrollin e automjeteve që transportojnë mallra dhe udhëtarë. Gjithashtu u verifikua dokumentacioni përkatës.
Sipas njoftimit zyrtar të Policisë së Kosovës, si rezultat të kontrolleve u shqiptuan gjithsej 36 gjoba dhe fletëparaqitje për kundërvajtje të ndryshme. Vlera e gjobave variroi nga shumat më të ulëta deri në 600 euro, varësisht nga natyra e shkeljes.
Masat ndëshkuese u aplikuan si ndaj drejtuesve të mjeteve, ashtu edhe ndaj personave juridikë, përkatësisht subjekteve afariste.
Policia e Kosovës thekson përkushtimin për zbatimin e ligjit, rritjen e sigurisë në komunikacion dhe mbrojtjen e mjedisit. Ajo do të vazhdojë bashkëpunimin me institucionet përgjegjëse për garantimin e rendit dhe sigurisë publike.