Policia e Kosovës identifikoi 15 vetura të paregjistruara që qarkullonin në një rrugë rajonale të Podujevës, gjatë një kontrolli që zgjati tri orë. Aksioni u zhvillua nga Njësia Rajonale e Trafikut Rrugor, në kuadër të një plani operativ për rritjen e sigurisë në trafikun rrugor dhe parandalimin e aksidenteve.
Gjatë kontrollit u përdorën pajisje dhe vetura inteligjente për monitorimin e trafikut. Sipas njoftimit të policisë, ndaj drejtuesve të automjeteve u morën masat e parapara me ligj, përfshirë shqiptimin e gjobave dhe largimin e menjëhershëm të mjeteve nga trafiku.
Policia u bëri thirrje pjesëmarrësve në trafik të respektojnë rregullat e komunikacionit dhe t’i regjistrojnë automjetet në kohë. Ajo njoftoi se përdorimi i teknologjisë dhe veturave inteligjente do të vazhdojë me intensitet në të gjitha rrugët e rajonit, me synimin për të rritur sigurinë dhe për të parandaluar aksidentet.