Ambasada e Shteteve të Bashkuara në Tiranë njoftuan më 8 prill 2026 se Njësia e Antiterrorit në Policinë e Shtetit po pajiset me dronët më të fundit të prodhimit amerikan.
Sipas njoftimit, këta dronë janë të pajisur me teknologji imazhesh termike, e cila mundëson monitorimin e situatave ditë e natë. Ata rrisin kapacitetin e policisë për mbrojtjen e kufijve dhe gjurmimin e elementëve të dhunshëm.
"Njësia e Antiterrorit në Policinë e Shtetit po pajiset me dronët më të fundit të prodhimit amerikan. Me teknologjinë e imazheve termike, këta dronë mund të rrisin aftësinë e Policisë së Shtetit në monitorimin e situatave ditë e natë për të mbrojtur kufijtë dhe për të gjurmuar elementët e dhunshëm", thuhet në deklaratën zyrtare të ambasadës.
Dronët, të cilët përdoren nga forcat e rendit dhe ushtria amerikane sipas specifikimeve ushtarake, ofrojnë aftësi pezullimi të gjatë, fushëpamje 360 gradë dhe zmadhimi. Ky investim forcon kapacitetet operacionale të policisë në kontrollin e territorit dhe sigurinë kufitare.
Ambasada thekson se mbështetja për institucionet shqiptare në fushën e sigurisë mbetet prioritet për rritjen e standardeve dhe efikasitetit kundër kërcënimeve.
Më herët, Shqipëria ka marrë tre dronë Bayraktar, të vendosur në bazën ajrore taktike të NATO-s në Kuçovë, për misione ushtarake, policore dhe civile. Kryeministri Edi Rama ka deklaruar se vendi synon prodhimin vendor të dronëve dhe mjeteve ushtarake.