Një incident është regjistruar gjatë natës së 17 majit 2026 në zonën e Hidrovorit të Akërnisë, ku prej disa javësh kanë nisur punimet për ndërtimin e një resorti turistik.
Sipas burimeve, një person i paidentifikuar ka depërtuar në kantier dhe ka spërkatur lëndë djegëse mbi një skrep dhe mjete të tjera të tonazhit të rëndë. Si pasojë, njëri prej mjeteve është përfshirë nga flakët dhe është shkrumbuar pothuajse tërësisht, ndërsa mjetet e tjera kanë pësuar dëmtime më të lehta.
Forcat zjarrfikëse kanë mbërritur menjëherë në vendngjarje dhe kanë neutralizuar flakët. Shërbimet e policisë kanë nisur hetimet për të identifikuar autorin dhe për të zbardhur rrethanat e ngjarjes.
Paraprakisht dyshohet për zjarrvënie të qëllimshme. Hetuesit nuk përjashtojnë lidhjen e ngjarjes me tensionet dhe kundërshtitë që kanë shoqëruar investimin në këtë zonë të mbrojtur ekologjike, veçanërisht pas protestave të kohëve të fundit të aktivistëve mjedisorë dhe banorëve.
Policia vijon punën për të dokumentuar shkakun e saktë të zjarrit dhe motivet e mundshme të aktit.