Një rast tragjik ka ndodhur gjatë orëve të para të së martës në qytetin e Pejës, ku një e mitur ka rënë nga tarraca e katit të gjashtë të një banese të vendosur në rrugën “Myrvete Maksutaj”.
Zëdhënësi i Policisë për Rajonin e Pejës, Driton Rugova, ka konfirmuar se njoftimi për këtë ngjarje është pranuar rreth orës 00:50. Menjëherë pas raportimit, njësitet policore kanë dalë në vendin e ngjarjes për të kryer veprimet e nevojshme hetimore. E lënduara është dërguar me urgjencë për ndihmë mjekësore në Spitalin Rajonal të Pejës, ndërsa pas vlerësimit të gjendjes, ajo është transferuar në Qendrën Klinike Universitare të Kosovës (QKUK) në Prishtinë.
Aktualisht, hetuesit e Sektorit Rajonal për Hetime në Drejtërinë Rajonale të Policisë në Pejë janë duke punuar për të zbardhur rrethanat dhe shkaqet që çuan deri te ky rast.
Përditësime
Drejtori i Klinikës Emergjente, Naser Syla, konfirmoi se e mitura ndodhet në gjendje të rëndë shëndetësore pas rënies nga lartësia. Pacientja ka pësuar politraumë dhe po merr trajtimin e nevojshëm intensiv në Klinikën e Pediatrisë në QKUK.