Edi Rama, kryeministër dhe kryetar i Partisë Socialiste, zhvillon sot, më 16 janar 2026, në orën 10:00, një mbledhje të zgjeruar me grupin parlamentar dhe drejtuesit e komisioneve në Pallatin e Brigadave. Takimi synon vlerësimin e veprimtarisë së grupit në Kuvend, performancën e komisioneve sektoriale dhe raportin mbi pjesëmarrjen e deputetëve në punimet parlamentare.
Mbledhja nis me fjalët hyrëse të Edi Ramës, të ndjekura nga ato të kryetarit të Kuvendit Niko Peleshi dhe kryetarit të grupit parlamentar Taulant Balla. Pas tyre, kryetarët e komisioneve do të paraqesin raportet zyrtare, me nga 10 minuta për secilin dhe diskutime të kufizuara në 2 minuta për folësit.
Lista e kryetarëve të komisioneve që raportojnë përfshin:
• Milva Ekonomi – Komisioni për Ekonominë, Punësimin dhe Financat;
• Ulsi Manja – Komisioni për Çështjet Ligjore dhe Administratën Publike;
• Bledar Çuçi – Komisioni për Çështjet e Brendshme dhe të Mbrojtjes;
• Blendi Klosi – Komisioni për Bujqësinë, Ushqimin dhe Zhvillimin Rural;
• Anila Denaj – Komisioni për Burimet Natyrore, Infrastrukturën dhe Zhvillimin e Qëndrueshëm;
• Evis Kushi – Komisioni për Edukimin, Shkencën dhe Sportet;
• Eduard Shalsi – Komisioni për Shëndetësinë dhe Mirëqenien Sociale;
• Iris Luarasi – Komisioni për të Drejtat e Njeriut dhe Mjetet e Informimit Publik;
• Erion Malaj – Komisioni për Kulturën, Turizmin dhe Diasporën;
• Igli Hasani – Komisioni për Europën dhe Punët e Jashtme;
• Fatmir Xhafaj – Komisioni për Nismat Qytetare, Bashkëpunimin dhe Mbikëqyrjen Institucionale;
• Damian Gjiknuri – Komisioni Posaçëm për Realizimin e Reformës Zgjedhore;
• Arbjan Mazniku – Komisioni Posaçëm për Reformën Administrativo-Territoriale.
Sekretari i grupit do të prezantojë raportin mbi mungesat dhe angazhimin e deputetëve në seanca, mbledhje dhe komisione. Mbledhja pritet të përfundojë rreth orës 15:00, me konkluzionet e Taulant Ballës dhe Edi Ramës.
Nesër, më 17 janar, Edi Rama do të zhvillojë një mbledhje me kryetarët e bashkive në Golem, në kuadër të bilancit të punës dhe planifikimit për 12 muajt e ardhshëm. Këto takime ndodhin para hapjes së sesionit parlamentar të vitit 2026, më 19 janar.
Përditësime
Mbledhja e Kryeministrit Edi Rama me grupin parlamentar të PS-së, në Pallatin e Brigadave, pritet të zgjasë deri rreth orës 13:30, në vend të 15:00 siç thuhej më parë.