Në ditën e 44-të të protestës radhazi para godinës së Kryeministrisë, aktivisti Edison Lika u ka bërë thirrje qytetarëve që të heqin dorë nga pushimet verore. Ai argumentoi se bojkoti i pushimeve është një sakrificë e domosdoshme për të mbështetur kërkesat për një Shqipëri më të mirë, me më shumë mundësi punësimi dhe ndershmëri në qeverisje.
Sipas aktivistit, pjesëmarrja e vazhdueshme në bulevardin “Dëshmorët e Kombit” përfaqëson një përpjekje kolektive për të ndërtuar të ardhmen brenda vendit, duke shmangur emigrimin e të rinjve. “Për 44 ditë ju i keni thënë këtij shteti se i doni vëllezërit dhe familjarët tuaj në Shqipëri. Ne nuk duam të largohemi, ne duam ta ndërtojmë të ardhmen tonë këtu”, deklaroi Lika gjatë fjalës së tij.
Organizatorët nënvizuan se protesta do të vazhdojë deri në përmbushjen e kërkesave, duke cilësuar bulevardin si vendin ku do të kalohen pushimet këtë vit. Kërkesat e parashtruara gjatë këtyre 44 ditëve përfshijnë kundërshtimin ndaj korrupsionit, ndërtimeve pa kriter dhe kërkesën për më shumë hapësira të gjelbra në qytete. Lëvizja synon që të krijojë kushte që qytetarët të mos ndihen të detyruar të largohen nga vendi për një jetë më të mirë.