Sipas të dhënave zyrtare të Institutit të Statistikave (INSTAT), ekonomia shqiptare regjistroi një rritje prej 3,71% gjatë tremujorit të parë të vitit 2026. Ky zgjerim është nxitur kryesisht nga sektori publik, ku aktiviteti që përfshin administratën, arsimin dhe shëndetësinë shënoi një rritje prej 13,93%, kontribut i ndikuar nga rritja e pagave në këta sektorë.
Kontribut pozitiv në rritjen ekonomike dhanë edhe aktivitetet e tjera të shërbimeve:
- Pasuritë e paluajtshme: rritje me 8,99% (+0,52 pikë përqindje)
- Aktivitetet profesionale dhe shërbimet administrative: rritje me 7,32% (+0,47 pikë përqindje)
- Ndërtimi: rritje me 3,3% (+0,32 pikë përqindje)
- Tregti, transport, akomodim dhe shërbim ushqimor: rritje me 1,61% (+0,21 pikë përqindje)
Në kontrast, sektorët prodhues shfaqën ecuri negative. Grupi i industrisë, energjisë dhe ujit shënoi rënie me 2,17%, duke ndikuar me -0,25 pikë përqindje në PBB. Gjithashtu, bujqësia, pyjet dhe peshkimi regjistruan tkurrje, duke kontribuar me -0,06 pikë përqindje.
Të dhënat e INSTAT tregojnë se konsumi final i popullatës u rrit me 3,94%, ndërsa eksportet e mallrave dhe shërbimeve shënuan rritje me 9,36%. Instituti bëri gjithashtu të ditur se rritja ekonomike për vitin 2025 u vlerësua në 3,66%, ndërsa për vitin 2024 ishte 4,03%.
Përditësime
INSTAT ka rishikuar në ulje rritjen ekonomike për tremujorin e parë të vitit 2025 në 3,76%, nga 3,83% që ishte vlerësimi fillestar. Për tremujorin e parë të vitit 2026, të dhënat pasqyrojnë një tkurrje prej 1,36% të konsumit final të qeverisë, krahas një zgjerimi prej 7,39% të importeve të mallrave dhe shërbimeve. PBB-ja me çmime korrente për vitin 2025 vlerësohet në 2,65 trilionë lekë, nga 2,52 trilionë lekë në vitin 2024. Sektori i shërbimeve vijon të mbetet motori kryesor i ekonomisë me 49,10% të PBB-së, ndërsa ndërtimi dhe industria kontribuan përkatësisht me 12,56% dhe 10,08%.