Qeveria shqiptare publikoi kuadrin e ri makroekonomik për vitet 2027-2029, të botuar në Fletorja Zyrtare. Sipas këtij dokumenti, rritja ekonomike parashikohet të jetë 4% këtë vit, 3.9% në 2027 dhe 4.1% në 2028.
Rritja pritet të vijë kryesisht nga kërkesa e brendshme, veçanërisht konsumi privat dhe investimet. Konsumi parashikohet të rritet mesatarisht me 2.9% në vit, ndërsa investimet me 4.9%, të nxitura nga përmirësimi i besimit dhe kushtet më të lehta të kreditimit. Kërkesa e huaj neto (eksport-import) do të ketë ndikim të moderuar pozitiv.
Kontributi i eksporteve dhe turizmit
Eksportet parashikohen të rriten mesatarisht me 4.6% në vit gjatë periudhës 2027-2029, kryesisht falë turizmit. Megjithatë, burimet theksojnë kontrastin me zhvillimet reale të viteve të fundit, ku eksportet e mallrave kanë rënë, prodhimi bujqësor është tkurrur dhe industria ka humbur peshë në ekonomi.
Struktura nga ana e ofertës
Projeksionet tregojnë një ekonomi të orientuar drejt shërbimeve dhe ndërtimit. Bujqësia parashikohet të rritet me 0.2% në vit, me ndikim të papërfillshëm në PBB. Industria me 2.6%, ndërsa shërbimet dhe ndërtimi do të mbajnë peshën kryesore të zgjerimit.
Punësimi pritet të rritet simbolikisht me 0.1% në vit, kryesisht nga rritja e pjesëmarrjes në forcën e punës, jo nga krijimi i vendeve të reja në sektorët prodhues.