Ish-ekspertë të Komandës Kibernetike të Shteteve të Bashkuara po bashkëpunojnë me Komandën Kibernetike të Shqipërisë për të forcuar mbrojtjen ndaj sulmeve kibernetike. Aktiviteti u zhvillua javën e kaluar në Qendrën e Inovacionit për Siguri dhe Mbrojtje në Tiranë.
Njoftimi i Ambasadës Amerikane thekson se specialistët amerikanë asistojnë autoritetet shqiptare në identifikimin e infrastrukturës kritike dhe në krijimin e strukturave më të qëndrueshme të sigurisë kibernetike. Trajnimi u mbështet nga Universiteti për Bashkëpunim në Mbrojtje dhe Siguri, institucioni kryesor arsimor i Departamentit të Mbrojtjes së SHBA-së për bashkëpunim ndërkombëtar.
Ambasada Amerikane në Tiranë deklaroi se ky partneritet rrit sigurinë rajonale dhe tregon angazhimin e përbashkët të dy vendeve përballë kërcënimeve kibernetike moderne.